الرئيسية / مجتمع / بوقالات شعبية

بوقالات شعبية

ارتبطت “البوقالة” بالجلسات العاصمية الأصيلة فوق أسطح البيوت العتيقة وفي ساحاتها، حيث اقتسم سكان العاصمة الجزائر المكان فأصبح للرجل الشارع وللمرأة السطح،

وبما أن كل البيوت متراصة سمح ذلك للنسوة بالانتقال عند بعضهن البعض، وأثناء اجتماعهن كانت البوقالات سيدة الجلسة خاصة في شهر رمضان، حيث تنوي الواحدة بينها وبين نفسها أن تهدي البوقالة لأحدهم

ويقال أنها كثيرا ما كانت “أي البوقالة” تعبر عن حالة صاحبتها.

أما فائدتها فكانت حينها السلوى الوحيدة لنساء العاصمة…

*باسم الله بديت.. وعلى النبي صليت … وعلى أصحاب الأسماء اللي تبدا بالألف هذي البوقالة نويت…

نطلب ربي الفتاح يعطيني نحل البيبان ونشوف الهناء ونرتاح .

 

* باسم الله بديت.. وعلى النبي صليت… وعلى أصحاب الأسماء اللي تبدا بالباء هذي البوقالة نويت…

هبط لقاع البحر، فرّشت زربية، خرجت لي جنية، قالت لي واش بيك يا بنية؟ قلت لها راحوا حبابي وخلاوني وحدانية.

 

* باسم الله بديت.. وعلى النبي صليت… وعلى أصحاب الأسماء اللي تبدا بالتاء هذي البوقالة نويت…

لو كان السعود تنغرس بالعود نغرس ميات عود في وطيّة، لكن السعود بيدّك يا معبود، يا سقام السعود سقم لي سعدي

 

* باسم الله بديت.. وعلى النبي صليت… وعلى أصحاب الأسماء اللي تبدا بالثاء هذي البوقالة نويت…

طلعت للغابة، صبت الضّرو يابس، قتلوا يا ضرو القمر يمشي ولا حابس، قالي مفرش زربية وحذاه طاوس .

 

* باسم الله بديت.. وعلى النبي صليت… وعلى أصحاب الأسماء اللي تبدأ بالجيم هذي البوقالة نويت…

رشّيت عتبة الباب بالزهر والطّيب، وسقيت كل الأحباب بالعسل والزبيب، وكي نسيت جاني جواب كنت نستناه من عند البعيد.

 

* باسم الله بديت.. وعلى النبي صليت… وعلى أصحاب الأسماء اللي تبدا بالحاء هذي البوقالة نويت…

مدّيت لقاع البير وفرّشت زربية، حرقست حرقوس ذهب من راسي لوذنية، فرحي يا يما سعدي زها.. واستشفاي في العدو اللي استشفى فيّ .

 

* باسم الله بديت.. وعلى النبي صليت… وعلى أصحاب الأسماء اللي تبدا بالخاء هذي البوقالة نويت..يما يما ديريلي تويقة في وسط الحديقة باش نشوف زهري كي تجيبو ذيك الوريقة.

 

* باسم الله بديت.. وعلى النبي صليت… وعلى أصحاب الأسماء اللي تبدا بالدّال هذي البوقالة نويت..

ديدو..ديدو..أنا سعدي مليح، قنديلي ضاوي، البنيان اللي بنيتو قع سجالي، بنياني فوق غرفة ولي يخصني يكملهولي العالي .

 

* باسم الله بديت.. وعلى النبي صليت… وعلى أصحاب الأسماء اللي تبدا بالراء هذي البوقالة نويت…

عسل يا عسل في باقة خضرا، يا شميمت العاشقين يا قمرا، حلف سيد الملاح ما يرأس أمر غير إذا جات غزالته باش تكمل الحضرة.

* باسم الله بديت.. وعلى النبي صليت… وعلى أصحاب الأسماء اللي تبدا بالزّاي هذي البوقالة نويت…

 

الدالية دلات.. ودلّى العنقود، خلي القمر ينكشف، والسحاب يذوب، وخلي لالات النسا تنال المرغوب.