البوقالة ليست مجرد لعبة أو تسلية، بل طقس رمضاني يحمل طابعا روحانيا واجتماعيا، تجلس النساء حول إناء فخاري،
وتوضع داخله خواتم تملكها الحاضرات، ثم تسحب قطعة مع قراءة مقطع يشبه الشعر الملحون، أو دعاء يُفسر على أنه “فأل” لصاحبة الغرض.
-ساقية مسقية ويعوم فيها الحوت اعطوني بنتكم ولا نطيح نموت ولا حبيت تموت غير موت بنتنا معطية وسومها غالي مية حبة لويز ومية حبة سلطاني.
-بعث لك برية في قرنفلة حمرا مكتوبة بالذهب قلت لك يا حبيبي
بدلتني بامراة، قال لي يا حبيبتي ما بندلك بالغير محبتك في قلبي حتى يشيب الطير .
-أنا راقدة في المنام نمت روحي لابسة قمجة، القمجة فرجة ما تكون غير حجة وللا تولدي ولد يخرج عالم وعالي الدرجة.
– خرجت في الليل نطلب من الله صبت النجوم دايرين بسيدي رسول الله كل نجمة تقول الغاني هو الله واحد ما يدي بيده والو غير اللي عطاه الله.
-السفينة اللي جابت باه نكفيها باللوز والسكر نطعم غاشيها بالزبدة والعطر نطلي سواريها نطلب من ربي العزيز للحج يديها.
-طاقة على طاقة لا تواريها سلمي على لالة اللي قاعدة فيها نجيب كاس الذهب ونسقيها نرفد غزالي من الحومة ونهرب بها.
-خرجت في نص الليل نطلب في ربي نصيب النجوم دايرين بالنبي العربي قلت يا اله يا معبود نحيلي الوسواس والغمة على قلبي.
-راني في وسط جنان السرور والبها ريتو بعيني راني حالفة بربي العالي هذا المرة ما ناخذ غير البراني.
-من درى اليابسة ترجع الخضرا ويا من درى الواد الناشف يرجع غدير و يا من درى تتبدل الساعة بالخير.
-أحباب البعد ما أجفاهم قالو لي أشربي من الحمام تنسايهم شربت كاس ورا كاس لا نار تطفى ولا قلب ينساهم.
-جاني في حب الملوك هدية مخبي في أوراقه أنا والحبيب في بلاد واحدة والقلب مشتاقه.
-طار لحمام وزاد في اليام ونزل على قبة الحمام فوق سطح الغرفة ريت سيد الملاح في السحين يتوضى بست خده اليمين ورشقت له وردة.
