البوقالة ليست مجرد لعبة أو تسلية، بل طقس رمضاني يحمل طابعا روحانيا واجتماعيا، تجلس النساء حول إناء فخاري، وتوضع داخله خواتم تملكها الحاضرات، ثم تسحب قطعة مع قراءة مقطع يشبه الشعر الملحون، أو دعاء يُفسر على أنه “فأل” لصاحبة الغرض.
مع الشمس الصبيحة عيني شافت لبعيد، فارس من الثنية جاني نهار العيد طلبت ربي يحن عليا وحققلي حلمي الوحيد.
– شفت الزين بعيني واش يصبرني عليه ابكيت على سنيني اللي فاتت بلابيه الحبيب اللي يبغيني ربي ليا يخليه.
– عيني في عين الحبيب وفمي حاشم أنا تمنيت الحنة معاه ندير الخاتم.
– يا لي جايا من العين وبيدك مليتي السلة سبحان من أعطاك أزين وزاد في بهاك ذيك الحلة.
– علاش يا لالا التخمام رحمة الله واسعة وكبيرة لو كان جات بالكلام نتحدثو ونعطوك تدبيرة بصح كل شيء بالمكتوب ويعيا والخير يبان وتزول عليك الهموم وتروح الحيرة.
– جيت ساميت البحر شفت الحوت يعوم عرفت ما عندي زهر في ذا الحظ المحموم كي غاب ضي القمر ما ردت ضي النجوم.
– التمر والحليب في طبق وسط الخيمة نهديهم للحبيب باه يوالف ديمة ما يعزش اللي في الجيب هذاك زوجي يالميمة.
– جاز على باب دارنا يفصل في العكري قتلو يا شباب فصل على قدي قالي حتى تجي لعندي نهديلك صور ذهب ونزيدك قلبي.
– خيوط الليل ذابت وشعاع الصبح بان والشمس فوق لاحت ذهب عليا لكان واللي زمان غابت جات ليوم تبان تسقم السعد ثابت اتهنيت والحظ زيان.
– عمتي يا عمتي وش بيك غضبانة لا بيك على الما راني رويانة ولا بيك على الطعام راني شبعانة ولا بيك على كحل العين ما نديه غير أنايا.
– إذا طاح الليل النهار راهو يطلع واذا كثر النحاس الذهب هو ليسطع وسيرتك كالعطر بين الناس القعدة بيك زينة وانت كالسلطان متربع.
– زغرتو وافرحو يا جيراني حبيبي ليراح جا اليوم وداني انتوما ليحبيتو تفرقو بيناتنا ربي وكيلكم يا عدياني والله مانسمح فيه يا كان نبغيه وهو بغاني.
