البوقالة ليست مجرد لعبة أو تسلية، بل طقس رمضاني يحمل طابعا روحانيا واجتماعيا، تجلس النساء حول إناء فخاري، وتوضع داخله خواتم تملكها الحاضرات، ثم تسحب قطعة مع قراءة مقطع يشبه الشعر الملحون، أو دعاء يُفسر على أنه “فأل” لصاحبة الغرض.
* راني راني في وسط جناني السرّ والبهاء ريته بعياني راني راني حالفة بالرباني هذه المرة ما نأخذ غير البراني.
* يا لالّتي فاطمة يالالّتي فطوم سبحان خالقك ريت النجوم في السماء حسبتهم ساقك العين تبكي عليك والقلب مشتاقك.
* السفينة اللي جات باش انكافيها باللوز والسكر نطعم غاشيها (أي ناسها) وبالزباد والعطر نطلي سواريها ونطلب ربي العزيز للحج يدّيها.
* بعثت لك يا شباب دموعي قرنفلة حمراء ياعدو بن عدو بدّلتني بامرأة قال لي والله يا لالة ما نبدلك بالغير محبتك في قلبي حتى يشيب الطير.
* عندنا شجرة معمرة بالياقوت وعندنا فوّارة معمرة بالحوت اعطوني ابنتكم ولا نطيح نموت.
* جايز على بابنا جايز واش تشوف انا لابسة لحرير وانت لابس الصوف قالها يا لالة لباس الرجال مخلوف ارواحي ليا نلبسك لقاط ونزيدلك الشنتوف.
* مشيتي مشية زهرية فاتو ثلث شبان عليك الأول قالك من صابك ليا والثاني قالك من صابك حلالي والثالث قالك من صابني الأرض وأنت تمشي عليا.
* طلعت للسطح وفرشت زربية، مر علي جن وجنية، قالولي ايش بيك يا لبنية؟ قلتلهم حبيبي غاب علي، قالولي نعملو اليد في اليد ونجيبوه ليك إن شاء الله هاذ العشية هدية.
* يا ناس لملاح مدولي بنتكم وإلا نطيح نموت..بنتنا شرطها غالي ومقامها عالي.. مدوهالي وإلا نشتكي بيكم لربي العالي.
* قطّعت اللحم بيدي وعملت بذور، وسمعت الكلام بوذني
وعرفت من قالو، يا قايلين الكلام القبيح واش تربحو، أنا طاوس في القصر وأنتم خفاش النهار ما يضوالو.
* جازت علي جنية، قالت لي واش تحوسي يا ولية، قلت لها مانى نحوّس لا على مال ولا على جاه، نحوس على من ضيّعت قولي ليّ .
* جايز على باب دارنا، لابس تلمساني، قتلو يا شيخ بالاك تنساني، قال لي والله ما ننساك، ونصيبك على ربي جاهو سلطاني.
* امّنت بالله، والمنام رؤية من عند الله، حمامة بيضا جات ترفرف عليّ، معاها حصان توقّف بين يديّ .
* نبعث لكم دموعي في مشوار ازرق، ونبعث كلامي في برية تحرق، ما ننساكم يا ناسي بحق إله مكة ببلاطها لزرق.
* سمعت قر الحمام في قاع السّجنة، لا من سقاه الما ولا من عطاه شعير، يا قمر.. الحمام يعيا ويحن، وتتعمّر النافورة، ونعودو لزمانا كيما كنا.
* خرجت ليلة الجمعة، في يدي شمعة، خرج لي ملاك حنين قالي: يا بنت السحاب حاجتك راهي مقضية، قلت ليه: يا سيدي طالت المدة، قالي: روحي لدارك تصيبيها قدّامك .
* لالة يا لالة يا ريش النعام يا اللي مربية في القطيفة والرخام ملّي شفتك وعشقتك ما بقالي منام.
