البوقالة ليست مجرد لعبة أو تسلية، بل طقس رمضاني يحمل طابعا روحانيا واجتماعيا، تجلس النساء حول إناء فخاري، وتوضع داخله خواتم تملكها الحاضرات، ثم تسحب قطعة مع قراءة مقطع يشبه الشعر الملحون، أو دعاء يُفسر على أنه “فأل” لصاحبة الغرض.
-رفـدت البـوقــال وتـوضيـت.. وفـرشـت الزربيـة وصليــت.. وفي صلاتـي دعيـت.. ومـا طال الحال حتـى كانـوا الخطـّابـة فـي البيـت.
-جازوا عليا ثـلاث شبـان.. اللّـوّل قالـي: من صابك خاتم في يـدي والثاني قالي: من صابك سنسلة في رقبتي.. والثالث قالي: من صابك أم أولادي ..
-شجرة اللوز تنهز بالعالي قلت لحبيبي بالاك تنساني قالي والله ما ننساك راكي في بالي بعثتلك سلامي في الماء يبرق وبعثتلك نجومي في السماء لزرق لوكان عرفت الزمان يفرق نكوي قلبي قبل ما نغرق.
-ياعسل التمـر يـا حـب الملـوك يا شجرة خضرة في وسـط جنانـي جوارحي على جميع النسا فضلـوك وقلبـي زاهـي بغرامـك متهنـي نلبسـك التـاج والنـاس يحيـوك أنا سلطانتهم وأنت سلطاني.
-ما تمنيت حاجة غير يدوملي داك الزين…. ونعيش في بهجة وندوق حبّك لحنين…. ياك نتي فريضة حبّك بعد حبّ ربي والوالدين… نعزّك يالوحيدة… أنت وردة غرستك في قلبي… بيك حياتي سعيدة… فالحبّ درتي نصيبي… أعيونك سويدة بهم ملكتني يالكبيدة.
-سبحـان من صـورك.. وخـلّاك فتنة للنـاس.. ما ولـدوك في البهجـة.. ولا مراكش.. ولا فاس.. فاتحة على خدك سبع حباس.. ورد وياسمين وقرنفل وباس.. ديتي كامل السّر واش خليتي للناس.
-اعطاك الله الزين وطباعك الحنينة كحل العين واتاك.. وردة في الجنينة في يد اللي حذاك يحفظك ربي من لعوينة ويخليلك اللي بغاك .
-زغرتو يا عدياني لي كرهتوه ولا وداني…. بعد ماقولتو فيه راح أو خلاني… موتو موتو يا عدياني…….أنا نتزوج ونتوما عسو بيباني.
-جاني في لمنام ثلث طيورا…. واحد أحمر وثاني أصفر وثالث خضر كي حشيش الجنة… واحد أعطاني وردة ولخر اعطاني خاتم….. وثالث قالي راني تحت رجليك خادم.
-جازت عليا لالات لورود ماصبرتش …عليها …قتلها يا زين الهدهود…ياحميرة…لخدود …قاتلي ماتحشمنيش …يا قد العود أنا مخطوبة ومهري معدود.
-انت هو رفيقي وأنت هو المصباح اللي تضوى بيه طريقي، حبك ردني كي المهبولة والناس تهدر وتقول يا طفلة فيقي قلتلهم هبال حبو احلا من العسل كي اليوم نولي ميمت وليداتو وشريكة حياتو وموحال نفرط فيه.
-نحبك وحبك خير من نور المصباح يا لعزيزة راني مكوي واذا تنويتي ننقهر وما يبقى في عقلي والو نحبك يا الحنينة يا الغالية و حبك ينسي لجراح نحبك يا الغالية انتيا اللي يزيديني فراح على فراح.
-أفهمني يا وليد الناس أنت راجلي وعزيزي وساكن القلب والراس، غيرتي عليك من حبي وما تقول مالها ساس، أنت شبيب وحلو الله يحفظك ويبعد عليا هذا الوسواس.
-لسمر يا لسمر .. يا لي مـعــرَّش على الياسمين .. أنا نخمم عليك .. بعدما عايروني بيك .. حبّوا يفرقوني عليك .. أنت خويتم و أنا فصيص فيك .. نحبك ونموت عليك .. وغير أنا اللي نديك ..
