البوقالة ليست مجرد لعبة أو تسلية، بل طقس رمضاني يحمل طابعا روحانيا واجتماعيا، تجلس النساء حول إناء فخاري، وتوضع داخله خواتم تملكها الحاضرات، ثم تسحب قطعة مع قراءة مقطع يشبه الشعر الملحون، أو دعاء يُفسر على أنه “فأل” لصاحبة الغرض.
سمعت قر الحمام في قاع السّجنة، لا من سقاه الما ولا من عطاه شعير، يا قمر.. الحمام يعيا ويحن، وتتعمّر النافورة، ونعودو لزمانا كيما كنا.
خرجت ليلة الجمعة، في يدي شمعة، خرج لي ملاك حنين قالي: يا بنت السحاب حاجتك راهي مقضية، قلت ليه: يا سيدي طالت المدة، قالي: روحي لدارك تصيبيها قدّامك.
لالة يالالة يا ريش النعام يا اللي مربية في القطيفة والرخام ملّي شفتك وعشقتك ما بقالي منام.
أنا مهري غالي اللي يحب يديني يحسب النجوم ويسهر الليالي ولي يبغيني يبنيلي قصر في العلالي.
جابولي الرمان مغلف في وراقو وأنا وحبيبي في بلاد وحدة والقلب مشتاقو.
ما نديها طويلة سلوم راشي، ما نديها قصيرة فكرون ماشي، نديها مربوعة قد كي علم الباي ماشي.
مشيتي عالية وطولتي دالية شبان ورجال يتبعو فيا ويمشو مذلولين يتبعوا فيّ…ومن غير المولى وحبيبو ما في مين يعلى عليا.
خرجت في الليل نطلب في الله صبت النجوم دايرين وقالولي صلي على رسول الله *صلى الله عليه وسلم * واللي تستناهم راهم راجعين.
قالي طبيبي بلاما يدري تداوى يا عليل، ودايا ودوايا عند حبيب لمحبتو بخيل، وقتاش يا عمري ترحمني وترحم دموعي لي تسيل.
الاسمر يا لسمر يا شباب الحومة وشبيك غضبان علينا، احنا ما نسواو بلا بيك، لوجه ربي راضينا وارض علينا.
قريب الرفيقة يا قريب الرفيقة، بيني وبينك تويقة، يا مخلي في قلبي شقيقة روح وين تروح وتعيا ترجع ليا ونرد لقلبك الحريقة.
ما ناكلش من جنان الجنة لو يشهيني وما ناخذش الشيخ ولو يغنيني ناخذ الشباب أبيض ولا أسمر المهم هولي يملالي عيني.
دزيت باب الحبيب دفة على دفة فراشو من حرير نرقد وندفا، بوقالو من ذهب نشرب لا نروى، وكلامو من عسل غير نسمع نشفى.
انت سبيبط وانا خويط فيك، انت سنيسلة وانا خامسة تحميك، انت خويتم وانا حجرة تبهيك، وين تروح تلقاني وغير أنا اللي نديك.
باسم الله بديت وعلى النبي صليت وعلى الصحابة رضيت وعيّطت يا خالقي يا مغيث كل مغيث يا رب السماء العالي بيك أستغيث ارحمني في هاذ الدنيا وسقملي السعد ديالي.
سبحان خالقك، ريت النجوم في السماء حسبتهم ساقك، العين تبكي عليك والقلب مشتاقك.
بعثت لو دموعي قرنفلة حمراء، يا عدو بن عدو بدّلتني بامرأة، قال لي والله يا لالة ما نبذلك بالغير محبتك في قلبي حتى يشيب الطير.
في الدار صندوق مخبي فيه الذهب والمرجان وروبة قضيفة قالولي ليمن راك مخبيها قلتلهم لهاديك مولاة الشان والمشية الضريفة.
خرجت نطلب الله صبت النجوم تطلب في رسول الله واحد ما يدي غير ما عطاه الله.
حبيبي يا حبيبي قطعوا فيك تقطاع البصل حتى سمعو بيك ناس جيجل والقصر، والله ما نسمح فيك يا نور القمر.
