البوقالة ليست مجرد لعبة أو تسلية، بل طقس رمضاني يحمل طابعا روحانيا واجتماعيا، تجلس النساء حول إناء فخاري،
وتوضع داخله خواتم تملكها الحاضرات، ثم تسحب قطعة مع قراءة مقطع يشبه الشعر الملحون، أو دعاء يُفسر على أنه “فأل” لصاحبة الغرض.
-ربيت الحمام في قفص المرجان وكلتلته السكر الأحمر والجلجلان نطلب من سيدي ربي يرجع لي سعدي.
-بنبرة يا بنبرة وقرنفلة حمرا قولوا لنبنبرة يا لي بدلتني بمرة اللي بدلك بدليه وزيدي الشباب عليه اللي خير منه وعزيز عليه.
-هبطوا البنات لجنان هبطت حتى أنا نطقت اللولى قالت أنا نعسانة نطقت الثانية وقالت أنا عطشانة نطقت الثالثة قالت أنا نترجى في الحبيب اللي ما جانا.
-سلام بعد سلام وسلامي في ورقة تشينة ما زلنا في القلوب ولا تنسينا.
-بيني وبينك طويقة قد دروة الكاس الحديث بيناتنا واش جابه للناس عرض أدم كالرصاص إذا ذاب خلاص.
-غرست ياسمينة في وسط الدار عروقها سكنجبير وأوراقها زنجار يما يما ما احلى عشق الجار العين في العين والقلب شاعلة فيه النار.
-هبطت لقاع الجنان وصبت للملاح أرقود اتنفست الدالية وتنهد لعنقود السحاب يقول نكشف والقمر يقول ندوب خلي العشاق ترقد وكل شي بالمكتوب.
-خليلتي مغنجة العيون عليها راني مهموم وعليك يا خليلتي نخلي بلاد الروم.
– هابطة في الدروج تكركر في فوطتها من صابني سلسلة في رقبتها ولا خويتم في صبعها نبوس خدها اليمين ونزيد شفتها.
-هبطت لقاع لجنان ولقيت الشاب غايس قلت له يا شاب وشبيك غايس قال لي صبت سفينة بلا رايس حبيني ونحبك نصبحو عرايس.
-تلمسان يا تلمسان يا لي فيك الطبل والكيسان واحدة ادات العلام وواحدة ادات الكيسان وانا ديت سيد الرجال.
-يالقاعدة في الرياض بالشدة والتخبيلة عينك توت فريز وحواجبك نيلة تمنيت نجي لعندك على ليلة قلبي متوحشك وما صبت له حيلة.
-أحمد يا أحمد واسمك غالي رد روحك طبيب أجي تشوف حالي نفرش لك فراش حرير ونغطيك بازاري.
-حبطت لقاع لبحر ولقيت الما يغلي خفتوا بيدي خرجت لي حوتة وقالت لي يفرج ربي.
-فاطمة فطوم يا سارة النجوم ولا تطلعي للسما نديرك سلوم ولا رحتي للبحر نديرك عوامة والمكتوب اللي يديك ما يكون غير أنا.
-لو كان تدرسوني دريس الكروية ولا تقطعوني قطيع الزرودية والله ما ننساك يا ممو عينيا.
-السميد صفيتو واللوز دقيتو نطلب من ربي ما نعيا في بيتو.
-أحمد يا أحمد يا لعيروني بيك أنت خويتم الذهب وأنا فصيص فيك وأنت سنيسلة وأنا قليب فيك أنت محبس حبق وأنا نسقيك نضاربو ذراع بذراع ولي تغلب تديك.
-الخمري يا الخمري يا اللي كويتني بجفاك من جهتي كون مهني والله ما ننساك.
-شاب جايز على باب دارنا يطلب في تفاحة أعطيت له تفاحة قال ما بيا تفاحكم بيا محبتكم.
-هبطت لقاع البحر فرشت زربية جاز علي الطير رمالي برية ما جيت نفتحها ندمعو عيني.
-قالوا لي سمر قلتلهم خير من السحر قالوا لي رقيق قلت لهم رق من الجوهر الله يكون الحلال كثير الرزق وطويل العمر.
-يا اللي في الجبل وأنا في السفل حجبني عليك بابا مالقيت فاش نبعثلك برية غير في عنق حمامة قلت لك يا شاب لاقيني في طريق الحمام نبوسك في خدك الأيمن ونصوم عليك ثلاث أيام.
